Toshkent va Bishkek chegaralar demarkatsiyasi bo‘yicha ishlarni davom ettiradi

O‘zbekiston va Qirg‘iziston vakillari chegaralarni delimitatsiya va demarkatsiya qilish masalalari bo‘yicha komissiya ishini jonlantirish masalasini muhokama qildi.
Qirg‘iziston hukumati matbuot xizmatining xabar qilishicha, bu masala haqida Qirg‘iziston bosh vaziri o‘rinbosari Abdurahmon Mamataliyevning O‘zbekistonning Bishkekdagi elchisi Komil Rashidov bilan uchrashuvi chog‘ida gapirildi.

Mamataliyev tez orada Bishkekda hukumatlararo komissiyaning yig‘ilishini o‘tkazish zarurligini ta'kidladi.
“Savdo-iqtisodiy hamkorlikning rivojlanishi Qirg‘iziston va O‘zbekiston xalqlari o‘rtasida birodarlik va barqaror munosabatlarning mustahkamlanishiga yordam beradi”, – dedi u.
Hukumatlararo qo‘shma komissiya 1996 yildan buyon ishlab kelmoqda. Shu paytgacha uning 7 yig‘ilishi o‘tkazildi. Oxirgi yig‘ilish 2009 yilning 28 dekabrida Toshkentda o‘tkazildi.