Rossiyada ishlashni istagan muhojirlar endi ball to‘plashiga to‘g‘ri keladi

Rossiya federal migratsiya xizmati mamlakat hududida chet elliklar vaqtinchalik yashash va ishlash uchun ruxsatnoma olishiga ball to‘plab erishishni taklif qilmoqda. Loyihaga ko‘ra, 100 balldan 66 ball to‘plagan muhojirlargagina Rossiya hududida qolish huquqi berilishi kerak.
Qaror loyihasi matni huquqiy-me'yoriy hujjatlarni tayyorlash haqidagi axborot portaliga muhokama uchun joylashtirildi.

“Loyihada kriteriylar, har bir ko‘rsatkich bo‘yicha to‘planadigan ballar miqdori o‘rnatiladi. Mamlakat hududida qolish uchun imtihon qilinuvchi 100 balldan kamida 66 ball to‘plashi kerak”, – deyiladi matnda.
Hujjatda o‘rganib chiqiladigan 8 asosiy kriteriy ko‘rsatilgan. Bular sirasiga yosh, ta'lim, rus tilini bilish, mehnat staji, Rossiyada yaqin qarindoshlarning va uyning borligi shular jumlasidandir.

Bu kriteriylarga ko‘ra maksimal ballni rus tilini juda yaxshi biluvchi, ilmiy unvonga ega, Rossiyada ta'lim olgan, besh yildan ortiq ishlagan, Rossiyada yaqin qarindoshlari bor 21-45 yoshdagi inson olishi mumkin.