1 sentabr kuni soat 11:00dan 18:00ga qadar Toshkent shahridagi 11ta maydonda “Betakrorimsan, yagonasan, ona Vatanim – O‘zbekistonim!” shiori ostida konsert dasturlari o‘tkaziladi. Bugungi kunda Mustaqillik kunini “Tengsizim, chamanzorim, yagonam – O‘zbekistonim!” shiori ostida nishonlashning ssenariysi ishlab chiqilgan. Bu haqda shahar hokimiyati vakillari gapirib berdi.
Ma'lum bo‘lishicha, ssenariy 4 blokka ajratilgan:
1. “Haqiqiy farzanding, asl o‘zbekman” nomli teatrlashtirilgan kompozitsiya. U Vatanga sadoqat, ona va bola mavzulariga bag‘ishlanadi.
2. “Elim sog‘lom bolasi, Vatanim gul, lolasi” nomli bolalar bloki. Unda bolalar vokal va raqs ansambllari chiqish qiladi.
3. “Farzandlari sog‘lom yurt qudratli bo‘lur” nomli uchinchi blok sportchilarning chiqishlaridan tashkil topadi.
4. “Kim edik-u, kim bo‘ldik” nomli oxirgi blok “Istiqlol solnomasi” teatrlashtirilgan kompozitsiyasidan iborat bo‘ladi.
Tadbirlarda “O‘zbekteatr” ijodiy birlashmasi vakillari, O‘zbekiston xalq artistlari va O‘zbekistonda xizmat ko‘rsatgan artistlar, “O‘zbeknavo” estrada birlashmasi artistlari, “Nihol” mukofoti, “Yagonasan, muqaddas Vatan!” tanlovi sovrindorlari, yozuvchi va shoirlar, chempionlar va sport ustalari ishtirok etadi.
Asosiy bayramlar Alisher Navoiy nomidagi milliy bog‘da, G‘afur G‘ulom, Mirzo Ulug‘bek, Bobur nomli, shuningdek, “Lokomotiv” va “Quyoshcha nuri” bog‘larida o‘tkaziladi. Xalq sayllari, shuningdek, Toshkent hayvonot bog‘i, sirk hamda mudofaa vazirligi ma'naviyat va ma'rifat markazi yaqinidagi maydonlarda bo‘lib o‘tadi.