Janubiy Koreyada harbiy safarbarlik haqida hazillashgan odam hibsga olindi

Janubiy Koreyada istiqomat qiluvchi 23 yoshli yigit yarim orolda vaziyatning keskinlashuvi munosabati bilan harbiy safarbarlik e'lon qilinishi haqida hazil xabarlar yuborganlikda gumon qilinib qo‘lga olindi. Bu haqda Yonxap agentligi xabar bermoqda.

Aytilishicha, Kim familiyali shaxs 4 nafar sobiq safdoshlariga SMS-xabar yuborib, KXDR urush boshlaganini aytgan. So‘ng milliy mudofaa vazirligi nomidan 21-33 yoshli zaxira askarlari urush e'lon qilingan taqdirda darhol chaqiruv punktlariga yetib kelishi zarurligini yozgan. Kim do‘stlari bilan hazillashmoqchi bo‘lgan.

Seul rasmiylari shimoliy qo‘shni artilleriyadan birinchi bo‘lib o‘t ochganligini aytmoqda. Bunga javoban Koreya Respublikasi bir necha o‘n raketa uchirgan. Har ikki davlatda qo‘shinlar tayyorgarlik holatiga keltirilgan.

20 avgust kuni Shimoliy Koreya xalq armiyasi bosh shtabi Janubiy Koreyaga ultimatum qo‘yib, psixologik kurash vositalari 48 soat ichida olib tashlanishini talab qilgan edi. Ultimatum muddati 22 avgust kuni mahalliy vaqt bilan soat 17:00da tugaydi.