AQShning O‘zbekistondagi elchixonasida nogironlar huquqlariga bag‘ishlangan tadbir bo‘lib o‘tdi

AQShning O‘zbekistondagi elchixonasida nogironlar huquqlari va AQShda nogirolar haqidagi qonunning qabul qilinganining 25 yilliga bag‘ishlangan tadbir bo‘lib o‘tdi, deb xabar bermoqda “Turkiston-press” MAA. 

Tadbirda O‘zbekiston nogironlar jamiyati a'zolari, bir qator davlat tuzilmalari mutaxassislari, xalqaro va notijorat  tashkilotlari, diplomatik korpus vakillari ishtirok etdilar.

“Biz bu yerda O‘zbekistondagi, AQShdagi va butun dunyodagi umid, tenglik va imkoniyatlarni nishonlashga yig‘ildik. Biz amerikalik nogironlar haqidagi AQSh qonuni – imkoniyati cheklangan odamlarga teng huquqlarni kafolatlovchi dunyodagi birinchi qonunning 25 yilligini nishonlamoqdamiz”, deb aytdi AQShning O‘zbekistondagi elchisi Pamela Spratlen.

Nogironlar haqidagi AQSh qonuni 1990 yilda qabul qilingan bo‘lib, AQShda imkoniyati cheklangan odamlarga kundalik turmushda boshqa fuqarolar foydalanadigan huquqlarni kafolatlaydi. Qonun alohida ehtiyojga muhtoj odamlarning huquqlarini va imkoniyatlarini kengaytirish hamda ular oldida turgan to‘siqlarni bartaraf etishda katta muvaffaqiyatga sazovor bo‘ldi.

“Ushbu qonuning qabul qilinguniga qadar nogiron odamlar tahqirlashga uchraganlar. Hozirda AQShda barcha trotauarlar nogironlar harakatlanishi uchun ochiq, ish beruvchilar nogironlik aravachasi balandligidagi stollarni o‘rnatadilar va ko‘zi ojizlar foydalana olishlari mumkin bo‘lgan kompyuterlar taqdim qiladilar. Avtobuslar nogironlar aravachasi salonga bemalol kira olishi uchun ko‘targichlarni tushirishi mumkin, avtomobillarda nogiron haydovchilar o‘z mashinalarini boshqara olishlari uchun maxsus moslamalar o‘rnatilgan”, deb ta'kidlab o‘tdi Pamela Spratlen.  

AQSh elchisi bu borada erishilayotgan ishlarda davlat tuzilmalari sa'y-harakatlari bilan bir qatorda alohida ko‘ngillilarning ham hissasi borligini ta'kidlab o‘tdi.

Imkoniyati cheklangan odamlarning huquqlari uchun kurashuvchilarning eng katta yutuqlaridan biri bu masalaning jahon miqyosiga chiqqani aytish mumkin. BMTning nogironlar huquqlari haqidagi Konventsiyasi 157 ta davlat tomonidan qabul qilingan.

Pamela Spratlen O‘zbekiston Vazirlar Mahkamasining 2015 yil 10 avgustda qabul qilgan “Keksalar va nogironlarni manzilli ijtimoiy himoya qilish va qo‘llab-quvvatlashni yanada kuchaytirish chora-tadbirlari to‘g‘risida”gi qarorini mamnuniyat bilan qarshiladi.

“Men O‘zbekistonda Mehnat va aholini ijtimoiy muhofaza qilish vazirligi tomonidan bu yo‘nalishda muntazam ish olib borilayotganidan, mamlakatda nogironlikka ega odamlarning huquqlari va ehtiyojlarini himoya qilishga katta e'tibor berilayotganidan juda xursandman”, deb aytdi Spratlen xonim.