Xitoyning Shandun provinsiyasidagi kimyoviy zavodda yuz bergan portlash natijasida 1 kishi halok bo‘lgani ma'lum qilindi. Bu haqda I Cross China xabar qilgan.
Eslatib o‘tamiz, 22 avgust kuni kechasi Shandundagi Tszibo shahri yaqinidagi kimyoviy zavod avval yona boshlagan, so‘ng portlash sodir bo‘lgandi.
Dastlabki ma'lumotlarda 9 kishi jarohatlangani aytilgandi.
Ma'lum qilinishicha, zavodda olov bilan ta'sirlashganda zaharli gazlar chiqaradigan shaffof suyuqlik – adiponitril ishlab chiqarilgan.
Voqea joyida kimyoviy falokatlar oqibatlari bilan ishlashga o‘rgatilgan 7 ta o‘t o‘chiruvchilar brigadasi ish olib bormoqda.
Bu portlash Tyantszin shahrida yuz bergan vayronakor portlashdan keyin 10 kun o‘tib sodir bo‘ldi. O‘sha portlash natijasida 121 kishi halok bo‘lgan, 54 kishi bedarak yo‘qolgandi.