Internetda yangi avlod Toyota Prius gibridining tashqi ko‘rinishi aks etgan fotosuratlar paydo bo‘ldi. Kamuflyajsiz avtomobil fotojosuslar tomonidan rasmiy fotosessiya chog‘ida suratga tushirib olindi. Suratlar Autocar nashrida chop etildi.
Mutaxassislarning ushbu fotosuratlarni o‘rganish asosida baho berishicha, gibrid turli nashrlarda ilgariroq e'lon qilingan renderlar va tasvirlarni aynan takrorlaydi.
Yangi Prius modul platformasida qurilib, 1.8 l li 105 ot kuchiga ega benzinli motor va 90 kuchli elektr dvigatelga ega bo‘ladi. Kompaniya gibridning ikki modifikatsiyasini taqdim etadi, ulardan birini maishiy tarmoqdan quvvatlantirish mumkin bo‘ladi.
Prius’ning jahon miqyosidagi taqdimoti oktabrda Tokio motorshousida amalga oshirilishi kutilmoqda. Dilerlar esa mashinani 2016 yili oladi.