O‘zbekistonda nodavlat notijorat tashkilotlarining 78 ta loyihasi grant tanlovlarda yutib chiqdi

2015 yil 29 avgustda O‘zbekiston Respublikasi Oliy Majlisida mamlakat parlamenti huzuridagi Nodavlat notijorat tashkilotlari va fuqarolik jamiyatining boshqa institutlarini qo‘llab-quvvatlash jamoat fondi mablag‘larini boshqarish Parlament komissiyasining yig‘ilishi bo‘lib o‘tdi.

Fondning ma'lumotlariga ko‘ra, yig‘ilishda Oliy Majlis Qonunchilik palatasi deputatlari, Senati a'zolari, NNT, OAV va fuqarolik jamiyati boshqa institutlari hamda mas'ul davlat muassasalari vakillari ishtirok etishdi.

Yig‘ilish davomida Parlament komissiyasi e'lon qilingan 3- va 4-grant tanlovlari bo‘yicha g‘oliblarni aniqladi. Joriy yilda o‘tgan yilgi shunday tanlovlarga nisbatan ishtirokchilar soni 3,1 barobar, loyihalar soni 3,3 barobarga oshgani qayd etildi. Hammasi bo‘lib 3- va 4-grant tanlovlarida 465 ta NNT, OAV va fuqarolik jamiyati boshqa institutlari ishtirok etib, ular tomonidan 353 ta loyiha taqdim qilindi.
Natijada 1 mlrd 950 mln. so‘mlik 78 ta loyiha g‘olib bo‘ldi.

Parlament komissiyasi, shuningdek, 29 avgustdan 6 oktabrgacha o‘tishi e'lon qilingan 5- va 6-davlat grant tanlovlarini o‘tkazish masalalarini ko‘rib chiqdi. Tanlovlar fuqarolik jamiyati institutlarining aholining huquqiy bilimlari, huquqiy madaniyati va huquqlarini anglashini oshirishni kuchaytirishga qaratilgan.
NNT, OAV va fuqarolik jamiyati boshqa institutlari taklifiga ko‘ra, yig‘ilishda qo‘shimcha grant tanlovi o‘tkazish tasdiqlandi. Buning uchun qo‘shimcha 700 mln so‘m ajratildi.

Qo‘shimcha tanlov fuqarolik jamiyati institutlarining O‘zbekiston xalqlari madaniy-tarixiy merosi, mamlakatda jamiyat hayotining turli sohalaridagi yutuqlarni ommalashtirish bo‘yicha loyihalarini qo‘llab-quvvatlashga qaratilgan.