Salvadorda avgust oyida 907 kishi qotillik qurboni bo‘ldi

Avgust oyida Salvadorda zo‘ravonlik eng yuqori cho‘qqiga ko‘tarildi. Milliy politsiya rahbari Maurisio Ramires Landaverdening ma'lum qilishicha, o‘tgan oyda 900 nafardan ziyod fuqaro qotillik qurboni bo‘lgan. Ayrim bashoratlarga ko‘ra, 2015 yil hisobidan mamlakatning 6,3 million fuqarosidan 6 mingdan ziyodi zo‘ravonlik qurboniga aylanishi mumkin.

“Bu juda og‘ir oy bo‘ldi. 907 marta qasddan qotillik sodir etilgan. Mazkur jinoyatlarning 10 foizida bolalar qotillar qurboniga aylangan”, – dedi Landaverde.

Uning qayd etishicha, halok bo‘lganlarning aksariyat qismi, shu jumladan, voyaga yetmaganlar ko‘chadagi turli jinoiy to‘dalar tomonidan o‘ldirib ketilgan. Adliya vaziri Benoto Laraning ta'kidlashicha, avgust oyida qotilliklarning avj olishiga asosan jinoiy to‘dalar o‘rtasidagi o‘zaro to‘qnashuvlar hamda ularga qarshi huquqni muhofaza qilish organlari tomonidan olib borilgan amaliyotlar sabab bo‘lgan.

Ma'lumotlarga ko‘ra, Salvadorda jinoiy to‘dalar a'zolari 70-75 ming nafarni tashkil etadi. Mamlakat qurolli kuchlari soni esa ulardan bor-yo‘g‘i ikki barobarga ortiq. U yerdagi “Mara Salvatrucha” hamda “Barrio 18” jinoiy to‘dalari nafaqat Salvador hududida, balki Markaziy Amerikaning boshqa mamlakatlarida ham ta'sir kuchiga ega.

Avgust oyi so‘ngida Yuqori sud tomonidan “terroristik to‘dalar” deya e'lon qilgan jinoiy uyushmalar harakati tufayli ko‘plab salvadorliklar o‘z uyini tashlab, hattoki mamlakatni tark etishga majbur bo‘lmoqda. Birgina 2014 yilda 280 ming kishi jinoyatchilik va bosqinchilik o‘sib ketgani sababli boshqa davlatlarga ko‘chib ketgan.