Turkiya xorijga chiqish pasportisiz sayyohlarni qabul qilishi mumkin

Turkiya moliya vaziri Nixat Zeybekchi mamlakatda maxsus sayyohlik zonalari tashkil etilishi rejalashtirilayotganini ma'lum qildi. Uning so‘zlariga ko‘ra, bu hududlarga xorijga chiqish pasportlarisiz kelishlari mumkin, deya xabar bermoqda “Rossiyskaya gazeta”.

Yanada aniqroq aytganda, ushbu zonalarga kirishga Turkiya hududiga tashrif buyurish sifatida qaralmaydi. Bu esa sayyohlarni chegara nazorati va bojxona ko‘riklaridan o‘tish zaruriyatidan xalos etadi. Shu bilan birga, xorijlik sayyohlarni ko‘proq jalb etish maqsadida bu yerdagi mehmonxona, restoran, savdo majmualari soliq to‘lashdan ozod etilgani tufayli hududda narx-navo arzon bo‘lishi aytilmoqda. Biroq mazkur imkoniyat hozircha mazkur zonalarga kema orqali tashrif buyuruvchi sayyohlarda mavjud.

Egey va O‘rta Yer dengizlari sohillaridagi Cheshme, Bodrum, Didima, Marmaris va Antaliya hududlarida maxsus sayyohlik zonalarini tashkil etish belgilangan. Ularning har biri uchun alohida takliflar ishlab chiqilmoqda. Qaysidir biri savdo-sotiq uchun qulay bo‘lsa, qay biridir faol dam olishga mo‘ljallanadi.

Moliya vazirining ta'kidlashicha, ushbu hududlarga Turkiya fuqarolari faqatgina xorijga chiqish pasporti bilan kirishi mumkin.

Ta'kidlash joizki, ayni paytda Turkiya sayyohlik bozori so‘nggi 10 yildagi eng og‘ir kunlarni boshdan kechirmoqda. Shu munosabat bilan hukumat vaziyatni barqarorlashtirish maqsadida faol ish olib bormoqda. Jumladan, ichki sayyohlikni qo‘llab-quvvatlash maqsadida 2015 avgust oyida sayyohlik sohasi vakillarining iltimosiga ko‘ra Turkiya xalq ta'limi vaziri maktab ta'tilini 28 sentabrga qadar uzaytirgan edi.

Ayni paytda yangi loyihada javoblardan ko‘ra jiddiy savollar ko‘proq. Gap shundaki, dunyoda bu kabi hududlarning o‘xshashi – namunasi mavjud emas. Mamlakatga pasport nazoratisiz ko‘plab kishilarning kirib kelish xavfi ham yo‘q emas. Bu esa xavfsizlik masalasini so‘roq ostida qoldirishi aniq. Biroq moliya vazirligining rejasi jiddiy ekani aytilmoqda.