Golf bo‘yicha Qozog‘iston ochiq chempionatida O‘zbekiston vakili uchinchi o‘rinni oldi

Joriy yilning 28-30 avgust kunlari Qozog‘istonning Almati shahrida joylashgan «Nurtau» golf klubida havaskor sportchilar o‘rtasidagi Qozog‘iston ochiq chempionati bo‘lib o‘tdi. Mazkur musobaqada O‘zbekiston terma jamoasi golf ustalari ham ishtirok etishdi, deb yozadi review.uz nashri.

Manbaning O‘zbekiston golf federatsiyasi bergan ma'lumotlarga tayanib yozishicha, ayollar va erkaklar o‘rtasida tashkil etilgan mazkur turnir yakunida o‘zbekistonlik Roman Ten umumiy hisobda uchinchi o‘rinni egallagan. Yana Tyagay «Best gros» kategoriyasi bo‘yicha ikkinchi o‘rinni qo‘lga kiritgan bo‘lsa, Yevgeniy Li va Kanat Kurbanaliyev ham kuchli o‘nlikdan joy olishgan.

Mazkur turnirda Qozog‘iston va O‘zbekistondan tashqari Qirg‘iziston, Koreya, Yaponiya va AQSh vakillaridan iborat 100 nafarga yaqin havaskorlar ishtirok etishdi.

Ma'lumot o‘rnida ta'kidlab o‘tish joiz, O‘zbekiston golf federatsiyasi joriy yilning boshida Golf Assotsiatsiyasi qoshida tashkil qilingandi.

O‘zbekistonda mazkur sport turini rivojlantirish maqsadida 1 iyundan boshlab 7-14 yoshli bolalar uchun bepul o‘quv kurslari tashkil qilina boshlangan. O‘tkazilgan sinov natijalariga ko‘ra, 50 nafar bola orasidan 14 nafar eng yaxshilari tanlab olinib ularga mazkur sport turi bo‘yicha saboq berish davom ettirilmoqda. Ular sportni o‘rganishi bilan birgalikda 100 ming miqdorida stipendiya ham olishadi.