Dunyodagi eng kuchli qiz Bashar Asadning rafiqasi taklifiga ko‘ra Suriyaga bordi

Dunyoning eng kuchli qizi, rossiyalik og‘ir atletikachisi Maryana Naumovna Suriya prezidenti Bashar Asadning rafiqasi Asmo Al-Asadning taklifiga binoan Damashqqa tashrif buyurdi.

16 yoshli sportchi qizning "VKontakte"dagi sahifasida ma'lum qilinishicha, u o‘z safari davomida Suriyadagi maktablar, sport majmualari va ayollarni harbiy tayyorgarlikdan o‘tkazish bazalariga ham boradi.

Bundan oldinroq, Naumova Donbassga 3 marta borgan va bir qator marosimlarda faxriy mehmon sifatida ishtirok etgandi. Shundan so‘ng, Ukraina pauerfting federatsiyasi Naumovaga bergan bir necha medallari va darajalarni bekor qilgandi. U Shimoliy Koreyadagi seminarlarda ham qatnashgandi.

Qayd etish kerakki, shu yilning bahorida Naumova Kaliforniyaning sobiq gubernatori Arnold Shvartsenegger bilan AQShdagi shoulardan birida uchrashib suhbatlashgan va unga "Donetsk xalq respublikasi"da yashovchi bolalar yozgan maktubni topshirgandi. Naumova ushbu taniqli shaxs bilan suhbatida undan Rossiya va AQSh munosabatlarining iliqlashishi uchun o‘z hissasini qo‘shishini so‘ragandi.