Rossiyada Yahoo videoxizmati IShID haqidagi film tufayli yopilmoqda

Rossiya Aloqa, axborot texnologiyalari va ommaviy kommunikatsiyalar sohasidagi nazorat bo‘yicha federal xizmati (Roskomnadzor) internet operatorlariga IShID to‘g‘risidagi film joylangani tufayli Yahoo video xizmati (screen.yahoo.com) ga to‘siq qo‘yish haqida buyruq yubordi, deya RIA Novosti agentligiga xabar berdi tashkilot vakili Vadim Ampelonskiy.

Uning so‘zlariga ko‘ra, Roskomnadzor 2014 yilda Yahoo`ga sakkiz marotaba videoxizmatdan taqiqlangan axborotlar yagona ro‘yxatiga kiritilgan “Qabilalar urushi” filmini o‘chirib tashlash zaruriyati to‘g‘risida xabarnoma yuborgan, biroq Amerika kompaniyasi tomonidan hech qanday javob bo‘lmagan.

“Shu munosabat bilan bugun (9 sentabr) biz mazkur film joylashtirilgan sahifaga to‘siq qo‘yish uchun aloqa operatorlariga buyruq yubordik. Opretorlar to‘siq qo‘yishni boshlashdi”, – dedi Ampelonskiy.

Rossiya hududida nafaqat ko‘rsatilgan sahifa, balki screen.yahoo.com resursiga ham shifrlangan https protokolidan foydalanilgani, bu esa operatorlarga resursni alohida URL-sahifalarga qadar tahlil qilishga yo‘l qo‘ymasligi sababli to‘siq qo‘yiladi.

Yahoo.com saytiga boshqa IP manzilda joylashgani bois to‘siq qo‘yilmasada, uchinchi darajali domenlar, masalan — news.yahoo.com ham videoxizmatlar bilan bitta IP manzilda joylashgani sababli bloklanishi mumkin.

Eslatib o‘tamiz, 25 avgust kuni Astraxan viloyati Chernoyarsk sudining “Vikipediya” internet-ensiklopediyasi to‘g‘risida chiqargan qarori asosida Rossiya aloqa operatorlari “Vikipediya” internet-ensiklopediyasining rus tilidagi saytini unga joylashtirilgan giyohvand moddalar to‘g‘risidagi maqola qonunga zid ekani tufayli bloklagan edi. Biroq giyohvand moddalar to‘g‘risidagi maqolani tahrir qilganidan so‘ng ushbu taqiq bekor qilingan.