Tojikiston bosh prokuraturasi 11 nafar isyonchini davlatga xiyonat qilishda aybladi

Tojikiston bosh prokuraturasi mudofaa vazirining sobiq o‘rinbosari Abduhalim Nazarzodaning 11 nafar tarafdoriga davlatga xiyonat qilish, terrorchilik, noqonuniy tarzda qurol-aslaha saqlash va boshqa bir qator moddalar bo‘yicha ayblov qo‘ydi. Bu haqda TASS axborot agentligiga Tojikiston Ichki ishlar vazirligi ma'lum qilgan.

“Avvalroq 6 sentabrda jinoiy guruh rahbari, isyonchi Abduhalim Nazarzoda va uning ikki yaqin sherigiga nisbatan shunday ayblovlar qo‘yilgan edi”, deb ta'kidlab o‘tdi Ichki ishlar vazirligi vakili.

Uning aytishicha, yaqin orada yana bir guruh terrorchilarga nisbatan ayblovlar qo‘yiladi.

Tojikistonning Romit darasida amalga oshirilgan aksilterrorchilik operatsiyasida 100 dan ortiq terrorchilar va ularning sheriklari qo‘lga olingan. Ulardan 12 nafari o‘z xohishi bilan taslim bo‘lgan, 22 terrorchi to‘qnashuvlar davomida yo‘q qilingan. Davlatga qarshi bosh ko‘targan guruh qoldiqlarini yo‘q qilish bo‘yicha operatsiya hamon davom etmoqda.