MSK: Qirg‘izistondagi saylovda birorta ham partiya 65tadan ziyod deputatlik mandatiga ega bo‘lmaydi

Qirg‘izistonda bo‘lib o‘tadigan parlament saylovlarida birorta ham siyosiy partiya 120 deputatlik mandatining 65tasidan ziyodini qo‘lga kiritmaydi. Bu haqda TASS muxbiriga 17 sentabr kuni respublikada saylovlar va referendumlarni o‘tkazish bo‘yicha Markaziy saylov komissiyasida ma'lum qilingan.

“Bunday cheklov mamlakat saylov qonunchiligida belgilab qo‘yilgan”, – deya ma'lum qilindi muassasada. MSK vakilining so‘zlariga ko‘ra, bu partiyalardan birining parlament hokimiyatida uzurpatsiyaga yo‘l qo‘yish imkoniyatini cheklash va mamlakatda demokratiyani rivojlantirish uchun joriy etildi

“Mazkur norma saylovlar natijalaridan qat'i nazar, hattoki partiyalardan biri nomzodlariga ko‘proq ovoz berilgan taqdirda ham, qo‘llaniladi”, –deya oydinlik kiritdi MSK vakili. Saylovlar yakuni bo‘yicha parlamentdagi o‘rinlar partiyalar o‘rtasida ular to‘plagan ovozlar soniga bog‘liq ravishda proporsional tartibda taqsimlanadi. Buning uchun ulardan fuqarolarning eng kamida 7 foiz ovozini olishi talab etiladi.

Qirg‘izistonda parlament saylovlari 2015 yil 4 oktabrda bo‘lib o‘tadi. Ayni paytda palamentdagi deputatlik o‘rinlari uchun 14 partiya kurash olib bormoqda. Ko‘pchilik mutaxassislarning fikricha, parlament saylovlarida amaldagi prezident Almazbek Atambayevning Sotsial-demokratlar partiyasi, shuningdek, “Ata Meken” sotsialistlari va “Bir bol” partiyasi vakillari yetakchilik qiladi.

Izoh: uzurpatsiya — hokimiyat yoki o‘zgalarning huquqini qonunga xilof ravishda tortib olish.