Intel va Lenovo Qoraqalpog‘istonning 5ta maktabi uchun 30ta noutbuk hadya qildi

Intel korporatsiyasi va Lenovo kompaniyasi YuNeSKOning O‘zbekistondagi vakolatxonasiga Qoraqalpog‘istonning 5ta maktabida mahorat sinflarini tashkil etishi uchun Intel texnologiyalari asosida ishlab chiqilgan 30ta noutbuk va 2si 1da transformerlarini taqdim etdi. Topshirish marosimi 17 sentabr kuni Toshkent shahrida ta'lim sohasidagi zamonaviy tendensiyalarga bag‘ishlangan matbuot anjumani doirasida tashkil etildi.

“Bugun axborot-kommunikatsiya texnologiyalari hayotimizning ajralmas qismiga aylandi. Ta'lim sohasiga AKTning joriy etilishi esa bolalarning ijodiy salohiyatini oshirish, axborot “iste'molchilari” emas, balki ularning “tayyorlovchilari”ni tarbiyalashda muhim odim bo‘lib xizmat qiladi”, – dedi Intel’ning Markaziy Osiyo va Kavkazorti mamlakatlaridagi mintaqaviy direktori Dmitriy Kisel matbuot anjumanida so‘zga chiqar ekan.

Intel 2010 yildan buyon YuNeSKOning O‘zbekistondagi vakolatxonasi bilan faol hamkorlik qilib kelmoqda. Jumladan, 2012 yilda korporatsiya xalqaro bolalarni himoya qilish tashkilotiga O‘zbekistondagi uchta maktabda “Bir o‘quvchiga bir kompyuter” o‘qitish metodini joriy etish uchun 60 dona mobil qurilma sovg‘a qilgan edi.

Shuningdek, O‘zbekiston Respublikasi Xalq ta'limi vazirligi hamda YuNeSKO bilan hamkorlikda Intel Teach “Get Started” dasturi bo‘yicha mamlakatimizdagi 70 ming nafardan ziyod o‘qituvchilar maxsus o‘quv kurslariga jalb qilingan.