Sinopec sobiq rahbari poraxo‘rlik sababli kommunistik partiyadan chetlatildi

Xitoyning Sinopec milliy neft-kimyo korporatsiyasi sobiq bosh direktori Van Tyanpu Xitoy Kommunistik partiyasi(XKP)dan chetlatildi. Bu haqda juma, 18 sentabr kuni XKPning intizomiy nazorat markaziy komissiyasi ma'lum qildi.

“Van Tyanpu jiddiy tartib va qonunlarni buzganlik, xizmat vazifasini suiiste'mol qilganlik va davlat mulklarida o‘z maqsadlari uchun noqonuniy foydalanganlikda gumon qilinmoqda”, – deyiladi e'lon qilingan hujjatda.

Yaqin kunlarda uning ishi yuzasidan hujjatlar huquqni muhofaza qilish organlariga taqdim etiladi.

2015 yil mart oyida xuddi shu kabi tergov ishi CNPC Xitoy milliy neft-gaz korporatsiyasi bosh direktori Lyao Yun'yuanga nisbatan ham olib borilgan edi.

Sinopec Xitoydagi uch neft gigantidan biri sanaladi. 2014 yilda korporatsiya 43,78 million tonna neft va 20 milliard kub metr tabiiy gaz qazib olib, o‘z ko‘rsatkichlari bo‘yicha CNPCdangina ortda qolgan edi.