Ispaniyada Gvardiolaning Kataloniya mustaqilligi uchun ovoz berishga chaqirgani tanqid qilindi

Ispaniya Sport vaziri Migel Kardenal Myunxenning “Bavariya” jamoasi murabbiysi Xosep Gvardiolaning Kataloniya aholisini hudud mustaqilligi uchun ovoz berishga chaqirganini tanqid qildi. Bu haqda DPA xabar berdi.

“Gvardiola yirik manipulyatsiya ishtirokchisiga aylandi. Buni ongli ravishda qildimi yoki yo‘q, men bilmayman. Ammo vaziyat Kataloniyada kechayotgan ko‘p narsalarni oydinlashtiradi”, - dedi Kardenal.
2015 yil iyul oyida Gvardiola Kataloniyaning Ispaniyadan ajralishi uchun harakat qilayotgan partiyaning saylov ro‘yxatiga kiritilgan edi.

44 yoshli mutaxassisning nomzodi “Kataloniya demokratik konvergentsiyasi” (Convergència Democràtica de Catalunya) bloki ro‘yxatiga rasman kiritilgan.
Gvardiola — asli kataloniyalik bo‘lib, futbolchilik va murabbiylik kar'yerasining katta qismini “Barselona” safida o‘tkazgan.
Kataloniyada mahalliy saylovlar esa 27 sentabr kuni bo‘lib o‘tadi. Ekspertlar ushbu saylovni mustaqillik referendumining muqobili sifatida e'tirof etishmoqda.

2014 yil noyabrida provinsiyaning Ispaniyadan ajrab chiqishi to‘g‘risidagi plebissit (juda muhim masalani hal qilishni umumxalq ovoziga qo‘yish, referendum)da 80 foiz kataloniyalik ishtirok etgan edi.