AQShda 19- urinishdan so‘ng tibbiyot tarixida ilk bor oyoqlari falajlangan bemor mustaqil qadam tashlay boshladi

Tanasining pastki qismi bir necha yillar muqaddam yo‘l-transport hodisasi tufayli falajlanib qolgan amerikalik Adam Fritts noyob tibbiy amaliyotdan keyin to‘rt metr masofani hech qanday tashqi yordamlarsiz bosib o‘tdi, deya xabar berdi NTV telekanali.

Mazkur muvaffaqiyatga yuqori texnologiyali jarrohlik amaliyotida shifokorlarning bemor oyoqlaridagi asab tolalarini uning miyasi bilan bog‘lashi natijasida erishildi. Tadqiqot iMove Kaliforniya universiteti laboratoriyasida bo‘lib o‘tdi. Innovatsion jarrohlik amaliyotining mohiyati shikastlangan orqa miya qismini aylanib o‘tishga asoslangan. Bunda miyadan yo‘naltirilgan elektr impulslar kompyuter orqali tizzalar ostiga joylashtirilgan elektrodlarga yuboriladi.

Ta'kidlash joizki, bunda faqatgina texnika yordamida muvaffaqiyatga erishilmadi: 28 yoshli bemor bir necha oylar davomida miyaning pastki qismlar harakatini ta'minlashga javobgar nuqtalarini qayta jonlashtirish va oyoq mushaklarini chiniqtirishga qaratilgan maxsus mashg‘ulotlarni ado etdi. Faqatgina shifokorlarning 19- urinishidan so‘ng bemor qadam tashlay boshladi.

Bu tibbiyot tarixida pastki qismi falajlangan bemorning robotlashtirilgan qurilmalar yordamisiz yana qaytadan yura boshlagan ilk hodisa bo‘ldi.