Yamanda hukumat kuchlari va isyonchi xusiychilar o‘rtasidagi qurolli ixtilof boshlangandan beri kamida 2355 nafar tinch aholi halok bo‘ldi, deb aytilmoqda 29 sentabrda chop etilgan BMTning inson huquqlari bo‘yicha oliy komissari boshqarmasi hisobotida.
Faqatgina oxirgi ikki haftaning o‘zida jangovor harakatlar 151 kishining umriga zomin bo‘ldi.
Chop etilgan ma'lumotlarga kuni-kecha arab koalitsiyasi harbiy-havo kuchlari tomonidan Vohija qishlog‘ida o‘tayotgan nikoh marosimiga yanglish zarba berilishi oqibatida halok bo‘lgan 130 nafar kishi kiritilmagan.
BMTning inson huquqlari bo‘yicha oliy komissari boshqarmasi Yaman hukumatini va arab koalitsiyasiga kiruvchi davlatlarni tinch aholining halok bo‘lishi haqidagi xabarlarni “mustaqil va xolis” tergov qilish imkoniyatini berishga chaqirdi.
Oxirgi ma'lumotlarga ko‘ra, Saudiya Arabistoni boshchilik qilayotgan koalitsiya Yamanda operatsiya boshlagandan beri halok bo‘lganlarning umumiy soni deyarli 5 mingga yetib qoldi.