Qozog‘iston TIV: Suriyadagi ijtimoiy fojia – dunyodagi eng jiddiy inqirozlardan biri

Qozog‘iston Tashqi ishlar vaziri Yerlan Idrisov Suriyadagi ijtimoiy fojiani “dunyodagi eng jiddiy inqirozlardan biri” deb atadi. Mamlakat tashqi ishlar bosh idorasi rahbari Qozog‘iston Respublikasining bu boradagi pozitsiyasini BMT Xavfsizlik kengashidagi ochiq debatlarda ishtirok etish asnosida ma'lum qilib o‘tdi.

Vazirning qayd etishicha, Qozog‘iston muzokara va tinchlik yo‘li bilan Suriya siyosiy kelajagini belgilash, mamlakatdagi zo‘ravonlik va qon to‘kilishlarga barham berishda xalqaro hamjamiyat – BMT, Arab davlatlari ligasi, AQSh va Rossiya Federatsiyasi ko‘radigan chora-tadbirlar, shuningdek, Suriya hukumati va muxolifat xatti-harakatlarini qo‘llab-quvvatlaydi.

"Qozog‘iston Suriya inqirozini faqatgina tinch yo‘llar bilan hal etish pozitsiyasida sobit qoladi”, - dedi Idrisov.

Qozog‘istonlik vazir mamlakat hukumatining global chaqiriqlarni hal etishda o‘z amaliy hissasini qo‘shishga tayyor ekanini ham ma'lum qildi.