O‘zbekiston musulmonlari idorasi eng xunuk 10ta bid'atni sanadi

O‘zbekiston musulmonlari idorasi rasmiy saytida «Bid'atdan saqlanaylik!» sarlavhali maqola e'lon qilindi.

"Arab tilidagi "bid'at" so‘zining lug‘aviy ma'nosi «bir narsani yangidan paydo qilish, yangilik kiritish» deganidir. Shar'iy istilohda dinda bo‘lmagan narsani dinga qo‘shish, diniy ishlarda keyinchalik noo‘rin joriy bo‘lgan odatlar "bid'at" deyiladi. Din esa Alloh taoloning O‘z Rasuli (sollallohu alayhi va sallam) orqali ko‘rsatgan yo‘rig‘idir. Dindagi bid'at ikki xil bo‘ladi: 1. E'tiqodga taalluqli bo‘lgan bid'atlar (mo‘'tazilalar, ravofizlar, jahmiya va boshqa toifalarning Ahli sunnat val jamoa e'tiqodiga qo‘shgan bid'atlardir). 2. Alloh hamda Uning Rasuli ko‘rsatmagan biror ish yoki odatni asossiz ibodat sifatida dinga kiritish kabi amaliyotdagi bid'atlar", deyiladi xabarda.

Maqolada eng xunuk bid'atlar o‘nta ekanligi tilga olinadi va ularning ba'zilari keltiriladi. Bulardan: Qur'oni karimni o‘qish, zikr, duo, namoz, tasbeh va boshqa amallarni pulga shartlashib qilish; o‘likni eslash uchun taom tayyorlash va yeyish, qabr ustida sham yoqish, kelin va o‘lik oldida zikr qilish, qabr ustida bino qurish, u binoni bezash va u yerda yotish; nafl namozlarini jamoat bo‘lib o‘qish; namozni ado etishdagi ta'dili arkonni tark etish, qarg‘a tumshug‘ini yerga urganday qilib namoz o‘qish; namozda imomdan oldinga o‘tish va unga qarama-qarshi turish; saflarni tuzatmaslik va boshqalar xunuk bid'atlardandir.