Independent: AQSh Rossiyani Suriyada yo‘q kuchlarni o‘qqa tutishda ayblamoqda

Yaqinda G‘arb “Suriya mo‘'tadil muxolifati” loyihasining muvaffaqiyatsizlikka uchraganini tan oldi. Endilikda esa u Rossiyani aynan o‘sha kuchlarga zarba berishda ayblamoqda, deb yozadi The Independent nashri.

“Xabar qilishlaricha, Rossiya “mo‘'tadil muxolifat”ni o‘qqa tutmoqda, bunday kuch esa, AQShning tan olishi, allaqachonlardan buyon yo‘q”, - deyiladi materialda.
Ta'kidlanishicha, bu kuchlar Suriya ozod armiyasiga qochib o‘tgan harbiylardan iborat edi, G‘arb davlatlari esa bu kuchni Asadning muqobili sifatida ko‘rayotgan edi.

Ammo bu armiya allaqachonoq parchalanib ketdi, qurolli guruhlarning katta qismi IShID va “Jabhat an-Nusra” tarkibiga qo‘shildi. Vashingtonning mo‘'tadil kuchlarga harbiylar tayyorlab berish dasturi ham ish bermadi: 70 nafar tayyorlangan jangchilar “an-Nusra” tomonidan tor-mor qilindi.

Shundan so‘ng MRBning sobiq rahbari Devid Petreus mo‘'tadil muxolifat inqirozini e'tirof etdi. Ammo Rossiya Suriyaga kirib kelishi bilan butun G‘arb yana mo‘'tadil muxolifatni esga oldi.
“Vaholanki bir necha haftagina muqaddam G‘arb bu kuchlardan voz kechgan edi”, - deyiladi maqolada.