Koalitsiya samolyotlari yana bir marta Yamandagi to‘y marosimiga bomba tashladi

Saudiya Arabistoni boshchiligidagi arab davlatlari koalitsiyasi samolyotlari Yamanda bo‘lib o‘tayotgan to‘y marosimiga ikki marta aviazarbalar berishi oqibatida eng kamida 15 kishi qurbon bo‘ldi, 25 kishi jarohatlandi. Bu haqda Associated Press axborot agentligi guvohlar ko‘rsatmasi va xavfsizlik xizmati vakillari so‘zlariga tayanib xabar berdi.

Aviazarbalar 7 oktabr kuni mamlakat poytaxti Sano shahridan 113 kilometr janubi-sharqdagi Damar provinsiyasiga berilgan. Raketalar to‘y marosimi o‘tkazilayotgan vaqtda xusiylar jamoasi rahbarlaridan birining uyiga yo‘llangan.
Koalitsiya tomonidan hozircha rasmiy izohlar berilmadi.

Eslatib o‘tamiz, xuddi shunday holat 28 sentabr kuni Yaman janubidagi Al-Mokxa shahri yaqinida joylashgan Vahija qishlog‘ida ham sodir bo‘lgandi. To‘y o‘tkazilayotgan hududga koalitsiya aviazarbalari berilishi natijasida 130 nafardan ziyod kishi, jumladan, bolalar va ayollar qurbon bo‘lgan edi.