WSJ: AQShning NATOdagi elchisi Suriyada "Rossiya harbiy bataloni" borligini ma'lum qildi

AQShning NATOdagi doimiy vakili Duglas Lyut Suriyada bir batalon miqdorida rossiyalik harbiylar borligini ma'lum qildi, deb yozmoqda The Wall Street Journal nashri.

Shu bilan birga, Lyut Suriyada Rossiya harbiylar guruhini tuzishdan maqsad hali aniq emasligini ta'kidlab o‘tdi. Uning aytishicha, harbiylar raketa artilleriyasi va zamonaviy tanklar bilan qurollangan.

"Biz ular nima qilmoqchi bo‘layotganliklarini kuzatib boramiz. Lataqiyadagi Rossiya guruhi faqatgina harbiy bazani himoya qilish uchun yaratilmagan, degan taxminlar bor", deb qo‘shimcha qilib o‘tdi Lyut.

Avvalroq Rossiya Mudofaa vazirligi rasmiy vakili Igor Konashenkov Suriyada 50 dan ko‘proq samolyot va vertolyot borligini aytgan edi. Uning aytishicha, Lataqiyadagi harbiy bazani qo‘riqlash uchun aloqa vositalariga ega dengiz piyoda askarlari batalon guruhi jalb qilingan.

Ma'lumot uchun, bir batalonda 800 gacha harbiy bo‘lishi mumkin.