2016 yildan O‘zbekiston Ravon brendi ostida bir qancha yangilangan modellarni Rossiya avtobozoriga eksport qilishni boshlaydi. Bu haqda “O‘zavtosanoat” kompaniyasining sayti orqali xabar berildi.
Ilgari xabar qilinganidek, O‘zbekistonda ishlab chiqarilgan avtomobillar endilikda Rossiya avtobozorida ushbu brend ostida sotiladi. O‘zbekiston avtomobilsozlari bugun Moskvada Uz-Daewoo markasining davomchisi hisoblangan yangi Ravon brendi taqdimotini o‘tkazdilar.
“Vaqt sinovidan o‘tkazilib, yangidan yaratilgan” shiori bilan taqdim etilayotgan yangi brend – Ravon so‘zi “yengil, toza yo‘l” ma'nolarini bildiradi. Oxirgi ikki yil ichida kompaniyamiz Daewoo markasi xaridorlarining didlari va ehtiyojlarini o‘rganib chiqdi va ular avtomobillarda xatarli tajribalardan ko‘ra hamyonbop narx va vaqt bilan sinalgan sifatlarni ko‘rishni istashlarini aniqladi”, - dedi taqdimot marosimida so‘zga chiqqan “O‘zavtosanoat” AK boshqaruvi raisi o‘rinbosari Tohirjon Jalilov.
Daewoo avtomobil markasi Daewoo International kompaniyasiga tegishli bo‘lib, GM Uzbekistan AJ kelishuvga muvofiq faqatgina eksport qilinayotgan avtomobillarida ushbu tamg‘adan foydalanayotgan edi. Ushbu kelishuv muddati tugayotgani bois yangi brend yaratildi.
Joriy yilda yangi brend faqatgina yangi belgilarga ega Matiz va Gentra avtomobillarini sotadi. Xususan, Ravon Matiz ABS, xavfsizlik yostiqlari, immobilayzer, yangi bamperlar, optika va radiator panjarasi bilan ta'minlanadi. Ravon Gentra esa restayling qilindi.
2016 yilda o‘zbek avtomobilsozlari o‘z modellar qatorini Ravon R2 (Chevrolet Spark 2010 muqobili), Ravon Nexia R3 keyingi avlod sedani (Chevrolet Aveo 2008 muqobili) hamda butunlay yangi Ravon R4 (Chevrolet Cobalt) hisobiga kengaytirishni rejalashtirmoqda. Keyinroq modellar qatori bir nechta S sinfidagi mashinalar va ixcham krossover hisobiga to‘ldiriladi.