Rossiya Mudofaa vazirligi: Suriyadagi parvozlar to‘g‘risida Pentagon bilan muzokaralarda rivojlanish bor

Rossiya Mudofaa vazirligining rasmiy vakili general-mayor Igor Konashenkov Pentagon bilan Suriyada harbiy aviatsiya parvozlari xavfsizligini ta'minlash bo‘yicha kelishuvga erishishdagi ijobiy o‘zgarishlar haqida so‘zlab berdi. Bu haqda TASS ma'lum qildi.

Uning aytishicha, Rossiya va AQSh mudofaa vazirliklari ekspertlari o‘rtasida Suriyada harbiy aviatsiya parvozlari xavfsizligini ta'minlash bo‘yicha ikkinchi videokonferensiya bo‘lib o‘tdi.

Ta'kidlanishicha, videokonferensiya jarayonida Rossiya va AQSh takliflari batafsil muhokama qilindi. Konashenkovning qayd etishicha, muhokamalar professional va konstruktiv ruhda o‘tkazildi.

Bundan avvalroq Konashenkov Rossiya zarba guruhlari tomonidan so‘nggi bir kun ichida IShIDning 63ta obektiga 64 marta parvoz amalga oshirilganini xabar bergan edi. Natijada terroristik tashkilotning 54ta obekti, jumladan, bitta dala qo‘mondonligi punkti, to‘rtta lager, yettita o‘q-dori ombori, artilleriya va minomyot batareyalari yo‘q qilindi.