Moskvada terakt sodir etishda gumon qilinib, qo‘lga olinganlar Suriyadan kelgani aytildi

Rossiya poytaxti Moskvada sodir etilishi rejalashtirilgan teraktni uyushtirishda gumon qilinib qo‘lga olinganlarning uch nafari Suriya fuqarolaridir. Bu haqda «Interfaks» axborot agentligi xabar tarqatdi.

Manbada yozilishicha, gumondor sifatida jami 10 nafar odam hibsga olingan.

«Interfaks»ning boshqa xabarida esa shubha ostidagilarning ko‘pchiligi Markaziy Osiyo mamlakatlari fuqarolari ekani aytib o‘tilgandi. Ulardan besh kilogramm og‘irlikdagi portlovchi qurilma topilgan. Bomba mobil qurilma orqali harakatga keltirishga mo‘ljallangan bo‘lgan.

Ma'lumot o‘rnida ta'kidlab o‘tish joiz, Moskvada sodir etilishi mumkin bo‘lgan terakt haqida 11 oktabr kuni kechqurun Milliy antiterror qo‘mitasi ogohlantirgandi. Tezqor tadbirlar natijasida qo‘lbola portlovchi moddalar topilgani xabar qilingan.