Turkiya bosh vaziri: IShID – Anqaradagi teraktlar bilan bog‘liq asosiy gumondor

Turk tergovchilari Anqaradagi teraktlarni katta ehtimol bilan IShID terroristik guruhi tashkil etgan, degan xulosaga kelishdi. Bu haqda 12 oktabr kuni NV telekanali efirida Turkiya bosh vaziri Ahmed Dovudo‘g‘li ma'lum qildi.
“Albatta, birinchi navbatda biz IShIDning aloqador ekanini aniqlashtiramiz, u asosiy gumondor hisoblanadi”, - dedi bosh vazir. Uning qo‘shimcha qilishicha, terroristlardan birining shaxsi ma'lum bo‘ldi, bu esa portlashlarning terroristik tashkilotlardan biri bilan bog‘liq ekanini ko‘rsatadi.

Bosh vazirning ta'kidlashicha, bir necha kun muqaddam Istambul va Anqarada o‘tkazilgan aksilterror amaliyotlari vaqtida xavfsizlik tuzilmalari xudkushlik jinoyatini sodir etishga tayyorgarlik ko‘rgan shaxslardan birini qo‘lga olgan.