BMT o‘zining Qandahordagi xodimasi halok bo‘lganini tasdiqladi

BMT o‘zining Afg‘onistonga ko‘mak berish missiyasida ishlagan huquq himoyachisi Turpoqoy O‘lfatning o‘limini tasdiqladi va “o‘z xodimasining o‘ldirilishidan achchiqlanayotganini” aytdi. Bu haqda ABC News telekanali ma'lum qildi.

BMT Bosh kotibi Pan Gi Mun marhumaning oila a'zolariga o‘zi hamdardligini bildirdi hamda mahalliy hukumatni jinoyatning tafsilotlarini batafsil va tezkorlik bilan tergov qilishga va jinoyatchilarni javobgarlikka tortishga chaqirdi. BMT Bosh kotibining rasmiy vakili Farxon Haq jahon tashkiloti xodimlariga nisbatan zo‘ravonlik qilish xalqaro gumanitar huquqning buzilishi ekanligini eslatib o‘tdi.

Dastlabki ma'lumotlarga ko‘ra, oxirgi yillar davomida BMTning Afg‘onistonga ko‘mak berish missiyasida ishlagan Turpoqoy O‘lfat 12 oktabrda Qandahor shahrida ishga ketayotganda o‘ldirilgan. Motosiklda bo‘lgan jinoyatchilar unga qarata o‘q uzgan va voqea joyidan qochib ketgan. Qotillik sabablari hozircha noma'lumligicha qolmoqda.

Ayni paytda birorta ham guruh yoki shaxs ushbu jinoyat uchun javobgarlikni o‘z zimmasiga olmadi. Qotillik yuzasidan tergov boshlandi.

2014 yilning 18 yanvarida Qobuldagi teraktda xuddi shu missiyaning rossiyalik a'zosi halok bo‘lgan edi. O‘shanda terrorchi-xudkush o‘zini portlatishi oqibatida 21 kishi, shu jumladan 13 nafar xorijlik halok bo‘lgan. Ushbu terakt uchun javobgarlikni “Tolibon” harakati o‘z zimmasiga olgan edi.