Yamanda oziq-ovqat mahsulotlari uchun narx-navolar qurolli mojarolar boshlanganidan beri 45 foizga qadar o‘sdi. Bu haqda BMT bosh kotibining rasmiy vakili Stefan Dyujarrik ma'lum qildi.
Uning so‘zlariga ko‘ra, faqatgina sentabr oyida narxlar o‘tgan oydagiga qaraganda 28 foizga ko‘tarilgan. “Kelib tushayotgan xabarlarga ko‘ra, oziq-ovqat mahsulotlari narxi sentabr oyida avgustga nisbatan 28 foizga oshib, inqiroz davrigacha bo‘lgan paytdagidan 45 foizga qimmatlashdi”, - dedi u.
Dyujarrikning ta'kidlashicha, BMT mamlakatda yonilg‘i yetishmasligini ham qayd etmoqda. “Gumanitar masalalar koordinatsiyasi bo‘yicha boshqarmaning xabar berishicha, sentabr oyida Yamanga Qizil dengiz orqali yonilg‘iga bo‘lgan ehtiyojning faqatgina 1 foizini qoplashga yetarli mahsulotlar kirib kelgan”, - dedi u. O‘tgan oyda esa bu raqam 12 foizni tashkil etgan.
BMT ma'lumotlariga ko‘ra, Yamanda harbiy harakatlar boshlanganidan buyon 2,1 ming tinch aholi vakillari hayotdan ko‘z yumdi, mamlakat fuqarolarining taxminan 80 foizini tashkil etadigan 21 mln yamanlik oziz-ovqat, dori-darmon va birlamchi mahsulotlarga ehtiyojmand. Tijoriy kemalar orqali qurol-yarog‘ olib kirilishidan xavfsiragan Saudiya Arabistoni boshchiligidagi koalitsiya Yamanni to‘liq blokada qilgani sababli mamlakatdagi gumanitar vaziyat tobora murakkablashib bormoqda.