Nazarboyev u bilan selfi tushmoqchi bo‘lgan milliarderni chetga surib tashladi

Qozog‘iston prezidenti Nursulton Nazarboyev MDHga a'zo davlatlar rahbarlari kengashining yig‘ilishi chog‘ida qozog‘istonlik milliarder va diplomat Bo‘lat O‘temuratovni noqulay vaziyatga solib qo‘ydi.

Facebook ijtimoiy tarmog‘iga joylashtirilib, keng muhokama qilinayotgan videolavhadan ma'lum bo‘lishicha, qirg‘izistonlik hamkasbi Almazbek Atambayevni kutib turgan Nazarboyev oldiga O‘temuratov yaqinlashib, birga selfi tushishni taklif qildi. Ammo milliarder endi cho‘ntagidan qimmatbaho iPhone’ini chiqarib, suratga tushirish uchun uni ko‘tarayotganida Nazarboyev qo‘li bilan chap yonidagi O‘temuratovni chetga surib tashladi va hech narsa bo‘lmaganday kutishda davom etdi.

Davlat rahbari bilan selfi tushish harakati muvaffaqiyatsizlik bilan tugagan sobiq xavfsizlik kengashi kotibi miyig‘ida jilmaygancha smartfonni cho‘ntagiga joyladi va kamera obektividan qochib ketdi.