Qirg‘izistonda kirill alifbosidagi .kr domeni ishga tushiriladi

Qirg‘iziston ICANN (domen nomlari va IP-manzillarni boshqarish bo‘yicha notijoriy korporatsiya)ga kirill alifbosidagi .kr domenini olish bo‘yicha ariza taqdim etdi. Bu haqda KirTAG Qirg‘iziston Transport va kommunikatsiya vaziri o‘rinbosari Ernis Mamirkanov ma'lumotiga asoslanib xabar qildi.

“Vazirlik nima sababdan Kirnet rivojlanmayotgani, qirg‘iz tilidagi saytlar ommaviy emasligi borasida blits-tahlil o‘tkazib ko‘rdi. Ma'lum bo‘lishicha, mintaqalar aholisi lotin tilini unchalik yaxshi bilmaydi. Shuning uchun biz ICANN`ga kirilchadagi domen olish uchun murojaat qildik”, - dedi vazir o‘rinbosari.

Uning so‘zlariga ko‘ra, korporatsiya lotin tilidagi kp domeni mavjudligi, uni kirill alifbosidagi domen bilan almashtirib qo‘yishlari mumkinligi to‘g‘risida ogohlantirgan. “Biroq kirilchadagi domen asosan Qirg‘iziston hududida qo‘llaniladi”, - dedi E.Mamirkanov.