Shvetsiyada qochqinlarni qabul qilish punktida yong‘in sodir bo‘ldi

16 oktabr kuni Shvetsiyaning janubiy viloyati Krunubergda joylashgan Yungbyu kommunasidagi sobiq maktab o‘rnida tashkil etilgan qochqinlarni qabul qilish punktida yong‘in yuz bergan. Bu haqda TT agentligi xabar tarqatdi.

Ma'lum qilinishicha, bu punktda 80 nafar qochqin kelishi uchun sharoitlar tayyorlab qo‘yilgan, karovat va to‘shamalar o‘rnatib bo‘lingandi.

Yong‘in tufayli jabrlanganlar yo‘qligi aytilgan.

Ayni vaqtda bu hududda tegishli idoralar vakillari vaziyat tafsilotlarini o‘rganishmoqda.

Politsiya bu yong‘in qasddan amalga oshirilgani mumkinligi bo‘yicha tekshiruv o‘tkazmoqda.
Qayd etish kerakki, Shveytsiya joriy haftada rekord miqdordagi qochqinlarni qabul qildi.

Bolqondagi urush vaqtida, 1992 yili qirollikka 84 ming 18 nafar qochqin kirib kelgandi.

Joriy yilning 9 oyida esa bu ko‘rsatkich 86 ming 223 nafarni tashkil etdi.
Bosh vazir Stefan Lyovenning aytishicha, mamlakatdagi muhojirlar soni 150 ming nafarga yetishi mumkin. Shvetsiya aholisi esa 9,5 mln nafarni tashkil etadi hamda Shvetsiya YeIda qochqinlar ulushi nisbatan eng ko‘p bo‘lgan davlatga aylanadi.