Iroq jangarilarga qarshi kurashda Rossiyadan yordam so‘rasa, AQSh ko‘magidan mahrum bo‘ladi

AQSh hukumati Iroqqa jangarilarga qarshi kurash ko‘rsatilayotgan yordamni to‘xtatishi mumkinligidan ogohlantirdi. Agar Iroq IShIDga qarshi kurashda Rossiyadan yordam so‘rasa va Rossiya Iroq hududiga kirsa, AQSh ko‘magidan mahrum bo‘ladi. Bu haqda AQSh Qurolli kuchlari shtablari boshliqlari qo‘mitasi rahbari Jozef Danfordga asoslanib, "Interfaks" xabar bergan.

"Men shuni aytishim kerakki, agar rossiyaliklar Iroq hududida harbiy amaliyotlar o‘tkazishni boshlasa, biz sizlarga yordam berishda davom etishimiz ilojsiz ishga aylanadi", deydi Danford.

Uning aytishicha, amerikalik harbiylar Iroqda rossiyalik harbiylar bilan parallel ravishda harbiy amaliyotlar o‘tkaza olmaydi.

Biroz oldinroq, Danford Iroqqa IShIDga qarshi kurash muammosini muhokama qilish uchun yo‘l olgani haqida xabar berilgandi.