Maykl Foks bog‘ichlari mustaqil bog‘lanadigan krossovkaning ilk sohibi bo‘ldi

“Kelajakka qaytib-2” filmidagi (1989) bog‘ichlari mustaqil bog‘lanadigan krossovka reallikka aylandi. Amerikalik aktyor, mazkur kartinada bosh rol – Marti Makflayni ijro etgan Maykl Jyey Foks uning ilk sohibiga aylandi.

Bu haqda 22 oktabr kuni sport liboslari, oyoq kiyimlari va inventarlari ishlab chiqarish sohasida yetakchi – Nike kompaniyasi ma'lum qildi.
Filmda aynan 2015 yilning 21 oktabr kuniga kelgan qahramon xuddi shunday xususiyatga ega kelajakdagi sport oyoq kiyimida yurgani tasvirlangan edi.

“Bugun Nike mazkur krossovkalarni ilk bor namoyish etdi va ularni eng mashhur sohibi bo‘lmish Maykl Jyey Foksga sovg‘a qildi”, - deya xabar berdi kompaniya.
“Nike Mag krossovkalari o‘zida odatiy bog‘ichlar tizimi va takrorlanmas dizaynni mujassam etib, pop-madaniyatning so‘nmas mayog‘iga aylanadi”, - deya qo‘shimcha qilingan xabarda.

Mahalliy kompaniyalarning yodga olishicha, 2009 yilda Nike Automatic Lacing System ("Bog‘ichlarning avtomatik tizimi”) nomi ostida o‘z mahsuloti uchun patent olgan edi.