Bishkekda terrorchini yo‘q qilish bo‘yicha o‘tkazilgan maxsus operatsiyada ikki nafar fuqaro va maxsus xizmat xodimi halok bo‘ldi

Qirg‘iziston poytaxti Bishkekda qamoqdan qochgan terrorchini yo‘q qilish bo‘yicha o‘tkazilgan maxsus operatsiya davomida ikki nafar fuqaro va Qirg‘iziston IIV tezkor javob berish maxsus otryadi (SOBR) jangchisi halok bo‘ldi. Bu haqda 23 oktabrda Qirg‘iziston IVV matbuot xizmati ma'lum qildi.   

“22 oktabrda Bishkekning “Do‘stuk” mikrotumanidagi uylardan birida o‘ta xavfli jinoyatchi Oltinbek Itiboyevni qo‘lga olish vaqtida jinoyatchi avtomat qo‘llagan holda faol qarshilik ko‘rsatdi. Biroq oxir-oqibat u yo‘q qilindi”, deb aytilmoqda xabarda. Vazirlikda aytilishicha, “teraktlarni amalga oshirishga yo‘l qo‘yib bo‘lmaslik” va fuqarolarning xavfsizligini ta'minlash maqsadida operatsiyaga yaqin joydagi uylardagi aholi evakuatsiya qilingan. Biroq operatsiyani fuqarolar orasida yo‘qotishlarsiz amalga oshirishning uddasidan chiqishning iloji bo‘lmadi. “Terrorchini qo‘lga olish vaqtida maxsus otryad jangchisi To‘labek Ismoilov hamda Itiboyevning qo‘shnisi 79 yoshli Batish Ko‘ychumanova va 56 yoshli Madad Kakeyev halok bo‘ldi”. IIV xabariga ko‘ra ularning barchasi o‘qotar jarohatlardan halok bo‘lgan.   

Yo‘q qilingan jinoyatchi 12 oktabrda Bishkek yaqinida joylashgan 50-tergov izolyatoridan qochib ketgan 9 kishidan iborat jinoyatchi guruhida bo‘lgan. Qochoqlar qochish paytida 4 nafar qo‘riqchini o‘ldirgan. Qochoqlardan 7 nafari terrorchilik, hukumat vakillari, jumladan militsiya xodimlari va milliy parlament deputatini o‘ldirganlik, diniy estremizm uchun umrbod ozodlikdan mahrum qilingan mahbuslar bo‘lgan. Uch nafar qochoq, shu jumladan mamlakatda taqiqlangan “Jayshul Mahdiy” terrorchilik guruhining faol a'zosi bo‘lgan Itiboyev qo‘lga olish vaqtida o‘ldirildi. Qolgan 6 nafar qochoq avvalroq qo‘lga olingan edi, ulardan 3 nafari qamoqxona shifoxonasida yurak yetishmovchiligidan o‘lgan.