Tayvanlik ayol samolyot bortida ko‘zi yorigani uchun jarimaga tortiladi

Tayvan fuqarosi bo‘lgan ayol AQShga yo‘l olgan samolyot bortida ko‘zi yorigani uchun jarimaga tortiladi. Associated Press xabariga ko‘ra, uchuvchilar yangi tug‘ilgan go‘dak xavfsizligini ta'minlash maqsadida Alyaska aeroportlarining biriga havo kemasini qo‘ndirishga majbur bo‘ldi.

Tayvan OAVlari ma'lumotiga ko‘ra, ayol taxminan 33 ming dollar jarima to‘lashi kerak. China Airlines aviakompaniyasi vakillari esa sug‘urtachi hisob-kitoblarni yakuniga yetkazmaganini ma'lum qildi.

Xabarlarga ko‘ra, ayol o‘z farzandining AQSh fuqaroligini olishini istagan va parvoz vaqtida tinimsiz ravishda layner AQSh havo kengliklariga kirdimi, deb so‘rayvergan. Alyaska ijtimoiy xizmat departamenti Syuzan Morgan so‘zlariga ko‘ra, chaqaloq tug‘ilganidan so‘ng samolyot qo‘ngan birinchi aeroport Amerikaga tegishli bo‘lgan, demak go‘dak AQSh fuqaroligini oladi.