Toshkent metrosida betmobilga o‘xshash poyezd paydo bo‘ladi

Toshkent metropoliteni poytaxt aholisi va mehmonlariga Yangi yil arafasida o‘ziga xos sovg‘a tayyorlamoqda – yo‘lovchilar uchun o‘ziga xos dizaynga ega tarkib ishga tushiriladi. Toshkent Metropoliteni boshlig‘i o‘rinbosari Abdulaziz Qosimov so‘zlariga ko‘ra, yangi tarkib 2015 yilning so‘ngiga qadar ishga tushirilib, Toshkent metrosining O‘zbekiston yo‘nalishi bo‘ylab harakatlanadi.

Illyustrativ surat. Betmobil. © Flickr

“U poytaxt aholisi va mehmonlari muqaddam metropolitenda uchratgan poyezdlardan farq qiladigan o‘ziga xos dizaynga ega. Hozirda interer va eksterer detallarini oxiriga yetkazish ishlari olib borilmoqda”, - dedi Qosimov Sputnik agentligiga.
Poytaxt metro tarkibini modernizatsiya qilish loyihasi 2013 yilda boshlangan edi. Qosimovning ta'kidlashicha, eski tarkiblardan faqatgina tashqi korpuslar qolgan bo‘lib, ular ham o‘zgacha qiyofaga keltirilgan.

Modernizatsiya jarayonida qo‘llanilayotgan ehtiyot qismlarning 30 foiziga yaqini milliy korxonalarda ishlab chiqarilgan.
Yangi poyezdni ko‘rishga muvaffaq bo‘lgan guvohlardan birining aytishicha, to‘rt vagondan iborat tarkib betmobilga o‘xshaydi.