Blatter: Agar AQSh JCh-2022 mezbonligi uchun raqobatda yutib chiqqanida, FIFAdagi mojarolar yuz bermasdi

FIFA prezidenti Yozef Blatter 2022 jahon chempionati mezbonligini AQSh emas, Qatar yutganidan xafa bo‘lganini tan oldi. Bu haqda u Financial Times nashriga bergan intervyusida tan olib o‘tgan.

«Ovoz berish yashirin byulletenlar orqali amalga oshirilgan. AQSh Yevropaning to‘rtta ovozini boy berdi va hisob Qatar foydasiga 14:12 ko‘rinishini oldi. Agar o‘shanda AQSh g‘olib bo‘lganida biz FIFAdagi muammolar haqida emas, balki Rossiya va shtatlarda o‘tgan ajoyib JChlar haqida gaplashib o‘tirgan bo‘lardik».

«Siz o‘shanda konvertni ochib JCh-2022 mezbonligini Qatar yutganini e'lon qilganimda yuzimni ko‘rganmisiz? O‘sha paytda men xursand odamlar qatorida emasdim», — deya qayd etib o‘tgan Blatter.

Eslatib o‘tamiz, bugun shveysariyalik mansabdor JCh-2018 mezbonligi Rossiyaga sirli kelishuv asosida olib berilganini ma'lum qilgandi.

Blatterning so‘zlariga ko‘ra, JCh-2018 va JCh-2022 ikkita yetakchi davlat — Rossiya va AQShga olib berilishi kerak bo‘lgan. Biroq so‘nggi daqiqalarda o‘sha paytda Fransiya prezidenti lavozimida o‘tirgan Nikolya Sarkozi UYeFA prezidenti Mishel Platinini AQShni emas, Qatar variantini qo‘llab-quvvatlashga ko‘ndirgan.