Floridada favqulodda vaziyatga uchragan Boeing samolyoti yo‘lovchilarini evakuatsiya qilish paytida 21 kishi jabrlandi

AQShning Florida shtatidagi Fort-Loderdeyl aeroportida 29 oktabrda Boeing 767 samolyoti chap dvigatelining yonib ketishidan keyin yo‘lovchilar evakuatsiya qilinayotgan paytda 21 kishi jarohat oldi. Bu haqda aeroport joylashgan Brouard okrugi o‘t o‘chirish-qutqaruv boshqarmasi ma'lum qildi.

Bir erkak yo‘lovchi evakuatsiya paytida uchish-qo‘nish polosasidan yugurib ketayotganda qoqilib ketib, boshidan jiddiy jarohat olgan. Avvalroq 15 kishi jarohat olgani ma'lum qilingandi.

Dynamic Airways aviakompaniyasiga tegishli Boeing 767 samolyoti chap dvigateli samolyot Karakasga uchishga hozirlik ko‘rayotganda, uchish-qo‘nish polosasida bo‘lganda yonib ketgan. Uchish-qo‘nish polosasiga chiqqan boshqa samolyotlar uchuvchilari samolyotning chap dvigatelidan yoqilg‘i oqayotganini ko‘rib, bu haqda nozirlarga xabar berishgan. Yong‘in oqibatida dvigatel va chap qanot butunlay yonib ketgan. Yo‘lovchilar samolyotni havo to‘ldirilgan traplar orqali tark etishgan.

Dynamic Airways kompaniyasida ma'lum qilinishicha, samolyotda 110 nafar yo‘lovchi va 9 nafar ekipaj a'zosi bo‘lgan. Guvohlarning aytishicha, ekipaj a'zolari bu vaziyatda o‘zlarini bosiq tutib, tezkorlik hamda uyushqoqlik bilan harakat qilishgan.

Ma'lum qilinishicha, voqeani tergov qilish uchun AQSh Federal aviatsiya boshqarmasi, Boeing kompaniyasi, dvigatellar ishlab chiqaruvchi Pratt&Whitney kompaniyasi va Dynamic Airways aviakompaniyasi vakillaridan iborat komissiya tuzilgan.

CNN telekanalining ma'lum qilishicha, samolyot 29 yil avval qurilgan bo‘lib, oxirgi marta joriy yilning iyunida texnik ko‘rikdan o‘tgan. Aynan o‘shanda yonib ketgan dvigatel almashtirilgan. U bor-yo‘g‘i 200 soat ekspluatatsiya qilingan.