2015 yilning 1 may kuni tashrif buyuruvchilarga o‘z eshiklarini ochgan o‘ziga xos “Ekspo-2015” ko‘rgazmasi o‘z ishini yakuniga yetdi. Yarim yil davomida mazkur ko‘rgazmaga 20 million nafardan ziyod kishi tashrif buyurdi.
31 oktabr kuni kechqurun bo‘lib o‘tadigan “Ekspo-2015”ning tantanali yopilish marosimida Italiya prezidenti Serjo Mattarella, Milan meri Juliano Pizapiya, viloyat rahbari Lombardiya Roberto Maroni ishtirok etadi.
“Ekspo-2015” “Dunyo aholisiga oziq-ovqat. Hayot energiyasi” (Nutrire il Pianeta. Energia per la Vita) shiori ostida o‘tkazilib, unda dunyoning 140dan ziyod mamlakati, shu jumladan O‘zbekiston delegatsiyasi, uchta yirik xalqaro tashkilot – BMT, YeI hamda Lotin Amerikasi va Karib havzasi mamlakatlari uyushmasi vakillari ishtirok etdi.
Olti oy davomida ko‘rgazma hududida 7 mingdan ortiq turli tadbirlar tashkil etilib, ularda asosiy e'tibor oziq-ovqat xavfsizligi, qishloq xo‘jaligi texnologiyalarini rivojlantirish, atrof-muhitni muhofaza qilish va tabiiy resurslarni tejash masalalariga qaratildi.
Bundan tashqari, ko‘rgazmaning alohida pavilonlari milliy oshxonalar, ovqatlar va qishloq xo‘jaligi tarixi, oziq-ovqat ishlab chiqarish sohasidagi innovatsiyalar va bioxilma-xillikni asrash masalalariga bag‘ishlanadi.
Navbatdagi jahon ko‘rgazmasi 2017 yilda Qozog‘istonning Ostona shahrida bo‘lib o‘tadi.