Xitoyda “bir oilaga bir farzand” qonuni 2016 yilning mart oyidan bekor qilinadi

O‘tgan hafta Xitoy kompartiyasi “bir oilaga bir farzand” qonunini yumshatib, oilalarga 2 farzand ko‘rishga ruxsat berilishini ma'lum qilgandi. Biroq yangi qoidalar 2016 yilning mart oyidan qonunan kuchga kiradi.

Ungacha barcha avvalgi qonunga amal qilishi kerak bo‘ladi, deb xabar bermoqda Xitoy Sog‘liqni saqlash va rejali tug‘ruq ishlari bo‘yicha davlat qo‘mitasiga iqtibos keltirgan holda Reuters axborot agentligi.

Xuan viloyati ijtimoiy xizmati mansabdor shaxsi yangi qonun e'lon qilinishi paytida homilador bo‘lgan ayollarni qonunni buzganlik uchun hech qanday jazo kutmasligini aytdi. Xitoy Sog‘liqni saqlash va rejali tug‘ruq ishlari bo‘yicha davlat qo‘mitasi bu xabarni inkor etdi.

“Yangi qonun kuchga kirmaguncha, mahalliy ma'muriyatlar amaldagi qonunga amal qilinishini qattiq nazorat qilishi, tug‘ilish miqdori hisobini olib borishi va o‘zi mustaqil qaror qabul qilmasligi lozim”, deb aytildi qo‘mitada.

Xitoyda bir necha o‘nlab yillar davomida faqatgina bir nafar farzand ko‘rishga ruxsat berilgan, ko‘p farzandlikka qat'iy soliqlar solingan. Pekin aholisiga 2013 yildan ikki nafardan farzand ko‘rishga ruxsat berilgan.