Turkmaniston prezidenti Gurbanguli Berdimuhammedov TAPH (Turkmaniston-Afg‘oniston-Pokiston-Hindiston) gaz quvurining Turkmaniston hududidagi qismi qurilishini boshlash haqidagi qarorini imzoladi. Bu haqda mahalliy manbalarga asoslangan holda RIA Novosti nashri xabar qilgan.
Qarorga ko‘ra, qurilish ishlari bilan shug‘ullanish "Turkmangaz" va "Turkmanneftgazqurilish" davlat konsernlari zimmasiga yuklatilgan. Quvur orqali yiliga 33 mlrd kubometr gaz tashilishi imkoniyatiga erishish rejalashtirilgan.
Qurilish ishlari dekabr oyida boshlanishi va 2018 yilda tugallanishi ko‘zda tutilgan.
Shu yilning martida loyiha uchun jami 7,6 mlrd dollar sarflanishi ma'lum qilingandi.
Ushbu loyihani amalga oshirishda Turkmanistonga Osiyo taraqqiyot banki moliyaviy ko‘mak beradi.
Loyihaning texnik va iqtisodiy asosini bank buyurtmasiga ko‘ra Britaniyaning Penspen kompaniyasi tayyorladi.
Ma'lumot uchun, Turkmaniston gaz zaxiralari bo‘yicha dunyoda to‘rtinchi o‘rinda turadi.