Finlyandiyada bir guruh musulmon qochqinlarga cho‘chqachilik markazidan boshpana berildi

Finlyandiyaning Xyuvinkya shahrida (Xelsinki yaqinida) sobiq cho‘chqachilik ilmiy-tadqiqot markazining binosida musulmon qochqinlarni joylashtirish markazi tashkil etildi. Bu haqda Iltalehti nashri yozmoqda.

Aytilishicha, ayni paytda u yerga 100 kishi joylashtirilgan. Markaz 300 kishiga mo‘ljallangan.
Markazning ochilishi arafasida finlyandiyaliklar binoning o‘tmishi musulmonlarning e'tiroziga sabab bo‘lishidan cho‘chishgan edi. Ammo yangi muassasa ijrochi direktori Milya Saksi bunday muammo kelib chiqmaganini ta'kidlab o‘tdi.

“Ilmiy-tadqiqot markazi 2 yil muqaddam faoliyatiga yakun yasagan, shundan buyon bu yerda cho‘chqalar saqlanmagan, - dedi u. – Biz qochqinlarga bu haqda gapirish kerak-kerakmasligini ham bilmaymiz. Boshqa tomondan olganda, bizning yashiradigan hech narsamiz yo‘q”.