Toyota’ning mitti kupesiga 1.2 l li turbomotor o‘rnatiladi

Toyota SF-R mitti kupesining sotuvga mo‘ljallangan versiyasi 1.2 l li 4 silindrli turbomotor bilan ta'minlanadi. Motoring nashrining eslatib o‘tishicha, uning prototipi Tokio avtoshousida namoyish etilgan edi.

Aprelda debyuti bo‘lib o‘tgan dvigatel 116 ot kuchiga ega bo‘lib, yoqilg‘ining bevosita purkalishi asosida ishlaydi. Shuningdek, u maxsus VVT-iW gaz taqsimotini o‘zgartirish tizimiga ega, buning natijasida motor kichik yuklamalarda Atkinson silsilasi bo‘yicha ishlaydi.

Kuch qurilmasining termik foydali ish koeffitsiyenti 36 foizga teng bo‘lib, yoqilg‘i sarfi 4.7 l/100 km ga teng.
Bundan tashqari, kupe 130 ot kuchiga ega 1.5 l li motor bilan ta'minlanishi mumkinligi aytilgan edi. Mashinaning bunday versiyasi faqat Yaponiya ichki bozori uchun chiqarilishi mumkin.

Turbomotorli versiya esa asosan AQSh va Yevropa bozori uchun mo‘ljallanadi. Har ikkala dvigatel Aisin kompaniyasining 6 bosqichli mexanik o‘tkazmalar qutisi yoki variator bilan uyg‘unlikda ishlaydi.
Kupe massasi ming kg dan oshmaydi.
Toyota SF-R kupesi 2018 yili sotuvga chiqarilishi kutilmoqda. Uning narxi taxminan 20 ming dollarni tashkil qiladi.