FIA 2020 yilga qadar yo‘llardagi o‘lim darajasini ikki barobar kamaytirmoqchi

Xalqaro avtomobil federatsiyasi (FIA/XAF) dunyo yo‘llarida o‘limga olib keladigan holatlarni ikki barobarga qadar qisqartirish maqsadida ishchi guruh tuzdi; BMT bosh qarorgohida bo‘lib o‘tgan ekspertlarning birinchi majlisida dunyo yo‘llarida xavfsizlik darajasini oshirishga yo‘naltirilgan o‘nta banddan iborat hujjat qabul qilindi.

Deklaratsiya BMT bosh kotibi Pan Gi Munga taqdim etildi. Dasturdan ko‘zlangan maqsad keyingi to‘rt yil ichida yo‘llardagi o‘lim holatlarini ikki barobarga kamaytirish, 2030 yilga qadar shaharlarda xavfsizlik va harakatchanlikni ta'minlashdan iborat. Mazkur vazifalar sentabr oyida dunyo davlatlari yetakchilari tomonidan qabul qilingan “Barqaror rivojlanish maqsadlari”da ham belgilangan edi.

Ishlar bir necha yo‘nalishlarda olib boriladi: infratuzilmalarni yaxshilash, harakatlanish vositalari xavfsizligini ta'minlash, samaraliroq qonunchilik, tezlikning oshirilishi va mast holatda transport vositalarini boshqarishga qarshi kurashni kuchaytirish. Hujjatda 2020 yilga qadar barcha yangi avtomobillar BMTning eng kam xavfsizlik talablariga muvofiq tarzda ishlab chiqarilishi taklif qilingan.

Jumladan, standart jamlanma (komplektatsiya)ga xavfsizlik yostiqlari, antiblok tormoz tizimi (AVS) va barqarorlikning elektron nazorati (ESC) kiritilishi lozim. Maktablar yaqinida past tezlik zonalarini tashkil etish va yo‘l harakati ishtirokchilari himoyasi hisobga olingan yo‘llar loyihasini yaxshilash ham ko‘rib chiqilmoqda. Shuningdek, hujjatda barcha mamlakatlar tomonidan yo‘l-transport hodisalarida o‘lim va jarohat olish holatlarini aniqlash va tasdiqlash uchun “30 kun” qoidasini qabul qilinishi zarurligi ham hujjatdan o‘rin olgan.

FIA huruhi ishtirokchilari eng kamida dunyodagi yarim davlatlarda beshta asosiy xavf omillari: tezlikning oshirilishi, mast holatda transport vositasini boshqarish, mototsikl maxsus bosh kiyimidan foydalanmaslik, xavfsizlik tasmalarini taqmaslik va bolalar o‘rindiqlari o‘rnatilmasligi holatlarini kamaytirishga erishishni ko‘zlagan. Bugungi kunda mazkur me'yorlar dunyo aholisining faqatgina 7 foiziga nisbatan joriy etilgan.

BMT bosh kotibi Pan GI Munning ma'lum qilishicha, bir yilda dunyo bo‘yicha o‘rtacha 1,25 million kishi yo‘l-transport hodisalari oqibatida halok bo‘ladi, ularning 90 foizi past va o‘rtacha daromadli mamlakatlar hissasiga to‘g‘ri keladi.