Kecha 13 noyabr kuni Namangan shahridagi Yoshlar markazi binosida Respublika oliy va o‘rta maxsus ta'lim vazirligi, o‘rta maxsus kasb-hunar ta'limi Markazi tomonidan o‘tkazilgan “Yilning eng faol ma'naviyat targ‘ibotchisi” Respublika ko‘rik-tanlovining yakuniy bosqichi bo‘lib o‘tdi.
Tanlovda Qoraqalpog‘iston Respublikasi va Toshkent shahri hamda 12 viloyatning o‘z hududlarida g‘oliblikka erishgan kasb-hunar kollejlari direktorlarining ma'naviy ma'rifiy ishlar bo‘yicha o‘rinbosarlari ishtirok etdilar.
Ishtirokchilar o‘quvchilar o‘rtasida ma'naviy tarbiyaga oid to‘rtta shart bo‘yicha bellashishdi. Yosh avlodni tarbiyalashga o‘zining munosib hissasini qo‘shib kelayotgan pedagoglar yig‘ilganlarga nafaqat o‘z kasbining, balki turli yo‘nalishlardagi savol-javoblar hamda sahna madaniyatida ham yuqori darajada iqtidor egalari ekanini namoyish etdilar.
Andijon viloyati sha'nini himoya qilgan Oltinko‘l iqtisodiyot kollejining ma'naviy ma'rifiy ishlar bo‘yicha direktor o‘rinbosari Zilola Toshtemirova har bir shartdagi savollarga mukammal tarzda bergan javoblari hamda muassasada o‘zi tashkil etgan “Andijon zukkolari” guruhi bilan ijro etgan sahna ko‘rinishlarini namoyish etib, tomoshabinlar olqishiga sazovor bo‘ldi.
Ko‘rik-tanlov yakunlariga ko‘ra birinchi o‘rinni Andijon viloyati vakili Zilola Toshtemirova, ikkinchi va uchinchi o‘rinlarni mos ravishda Toshkent hamda Farg‘ona viloyati ma'naviyatchilari egalladi.
Elmurod ERMATOV, Andijon-Namangan.