OAV: G20 sammitida Putin markaziy o‘rin egalladi, Rossiyaning izolyatsiyasi yakun topdi

Antalyada bo‘lib o‘tgan G20 sammitida Rossiya prezidenti Vladimir Putinga markaziy o‘rin berildi. Bu haqda The Wall Street Journal nashrining elektron versiyasi orqali xabar qilindi.

“Putinning fikricha, Rossiyaning G‘arb davlatlari tomonidan izolyatsiya qilinishi yakun topdi; Parijdagi teraktlardan so‘ng Rossiya prezidenti sammitdagi barcha voqealar markazida turdi, - deyiladi materialda. – Putinning taxminicha, Moskvaning g‘arblik hamkasblaridan uzoqlashishi yakuniga yetmoqda, negaki Rossiyaning Suriyada davom etayotgan harbiy kampaniyasi hamda Parij voqealari Putinni Turkiyadagi sammit markaziga olib chiqib qo‘ydi”.

“Kreml terrorchilikka qarshi kurashni G‘arb bilan aloqalarni mustahkamlash imkonini beruvchi eng istiqbolli sohalardan biri deb bilmoqda, - so‘zida davom etdi jurnalist. – Putin 2001 yil 11 sentabr kuni Oq Uyga qo‘ng‘iroq qilgan birinchi yetakchi bo‘lgan edi, va uning harakatlari Oq Uy hamda Kreml o‘rtasida qisqa muddatli iliq munosabatlar o‘rnatilishiga zamin yaratgan edi. Bugun esa u Parijdagi teraktlar butun dunyo davlatlari IShIDga qarshi yagona koalitsiyaga birlashishi lozimligini aytdi. Putin bu koalitsiyaga Asad ham kirishi lozimligini aytmoqda, ammo G‘arb Suriya yetakchisi bilan aloqa qilishdan hozircha bosh tortmoqda”.