Tim Kuk: Apple kompaniyasi MacBook va iPad qurilmalarini birlashtirmoqchi emas

Apple kompaniyasi rahbari Tim Kuk Independent nashriga bergan intervyusi chog‘ida kompaniya MacBook va iPad qurilmalarini birlashtirib gibrid devays yaratish niyatida emasligini bildirgan.

Uning fikricha, iste'molchilar uchun buning zarurati yo‘q.

«Biz mijozlarimiz uchun Mac va iPad`ning birlashtirilgan talqini aslida kerak emasligiga amin bo‘ldik», — deya gapirib o‘tgan Kuk. Bundan tashqari, uning qayd etishicha, Apple dunyodagi eng yaxshi planshet va eng yaxshi Mac yaratishni xohlaydi. Biroq ularning ikkalasini birlashtirgan holda bunday natijaga erishib bo‘lmaydi.

Shuningdek, Tim Kuk kompaniyaning elektrokarlar ishlab chiqarish yo‘nalishidagi faoliyatiga ham izoh berib o‘tdi: «O‘ylashimcha, yaqin bir necha yil ichida avtomobil ishlab chiqarish sanoatida elektrlashtirish va avtoboshqaruv kabi bir qator o‘zgarishlar qayd etiladi. Bunday vaziyatda foydalanuvchining interfeysiga alohida e'tibor qaratish lozim bo‘ladi. Shunday ekan bu borada men ko‘plab o‘zgarishlar bo‘ladi deb o‘ylayman».

Oldinroq, Tim Kuk iPad Pro juda ko‘pchilik uchun noutbuk va kompyuter o‘rnini bosayotganini ta'kidlab o‘tgandi.